तारापूर, ता.२७:व्यावसायिक दाखला देण्यासाठी लाच स्वीकारताना रंगेहात पकडल्या गेलेल्या तारापूर ग्रामपंचायतीच्या सरपंच संध्या पागधरे यांना अखेर पदावरून दूर करण्यात आले आहे. कोकण विभागीय आयुक्तांनी महाराष्ट्र ग्रामपंचायत अधिनियमांतर्गत ही धडक कारवाई केली आहे.
काय आहे प्रकरण?
१४ मे रोजी एका तक्रारदाराकडून व्यावसायिक दाखला देण्यासाठी ५ हजार रुपयांची लाच मागून ती स्वीकारताना पालघर लाचलुचपत प्रतिबंधक विभागाने (ACB) संध्या पागधरे यांना रंगेहात पकडून अटक केली होती. याप्रकरणी त्यांच्यावर तारापूर पोलीस ठाण्यात लाचलुचपत प्रतिबंधक कायद्यानुसार (सुधारित २०१८, कलम ७) गुन्हा दाखल करण्यात आला होता.
कारवाईचा घटनाक्रम:
प्रस्ताव सादर: लाचखोरीच्या गंभीर गुन्ह्यानंतर पालघर जिल्हा परिषदेच्या मुख्य कार्यकारी अधिकाऱ्यांनी (CEO) संध्या पागधरे यांना पदावरून हटवण्याचा चौकशी अहवाल व शिफारस प्रस्ताव कोकण विभागीय आयुक्त कार्यालयाकडे पाठवला.
सुनावणी व पुरावे: विभागीय आयुक्तांसमोर दूरदृश्य प्रणालीद्वारे (Virtual Hearing) मौखिक सुनावणी झाली. यामध्ये आरोपी सरपंचांच्या वकिलांचे लेखी म्हणणे, जिल्हा परिषदेचा चौकशी अहवाल आणि एसीबीची कारवाई या सर्व बाबींची सखोल पडताळणी करण्यात आली.
अंतिम आदेश: सरपंच पदासारख्या जबाबदार आणि घटनात्मक पदावर असताना संध्या पागधरे यांनी लाच स्वीकारून अत्यंत गैरवर्तवणूक आणि लांछनास्पद कार्य केल्याचे सिद्ध झाले. त्यामुळे महाराष्ट्र ग्रामपंचायत अधिनियम १९५९ च्या कलम ३९(१) मधील तरतुदींनुसार त्यांना तात्काळ सरपंचाच्या पदावरून दूर करण्याचे आदेश जारी करण्यात आले.