कंपनीच्या आवारात जागा असतानाही सार्वजनिक रस्त्याचा वापर; पादचाऱ्यांच्या सुरक्षिततेचा प्रश्न
बोईसर, ता. १२: तारापूर औद्योगिक वसाहतीतील ऑरो लॅबसमोर कंपनीच्या आवारात लोडिंग-अनलोडिंगसाठी जागा उपलब्ध असतानाही सार्वजनिक रस्त्यावर मालवाहू वाहने उभी करून मालाची चढ-उतार केली जात असल्याने नागरिकांच्या सुरक्षिततेचा प्रश्न निर्माण झाला आहे.
संबंधित वाहन रस्त्यावरील सफेद पट्टीच्या आत उभे असल्याचे दिसत असले, तरी मोठ्या मालवाहू वाहनामुळे रस्त्याच्या कडेला पादचाऱ्यांसाठी उपलब्ध जागा कमी होत असल्याची नागरिकांची तक्रार आहे. त्यामुळे पादचाऱ्यांना वाहनांच्या मार्गातून वाट काढावी लागत असून, अपघाताचा धोका वाढत असल्याचे नागरिकांचे म्हणणे आहे.
औद्योगिक परिसरात अवजड वाहनांची मोठी वर्दळ असते. अशा परिस्थितीत पादचारी, दुचाकीस्वार आणि इतर वाहनचालकांच्या सुरक्षिततेला प्राधान्य देणे आवश्यक आहे. केवळ वाहन सफेद पट्टीच्या आत उभे आहे की नाही, यापेक्षा त्याचा वाहतुकीच्या प्रवाहावर, पादचाऱ्यांच्या मार्गावर आणि दृश्यमानतेवर होणारा परिणाम महत्त्वाचा असल्याचे नागरिकांनी सांगितले.
कंपनीच्या आवारात जागा उपलब्ध असताना सार्वजनिक रस्त्यावरच लोडिंग-अनलोडिंग करण्याची गरज काय, असा सवालही उपस्थित होत आहे. दुर्घटना घडल्यानंतर उपाययोजना करण्याऐवजी प्रशासनाने संभाव्य धोका लक्षात घेऊन आधीच प्रतिबंधात्मक कारवाई करावी, अशी मागणी नागरिकांकडून होत आहे.
प्रशासनाकडून पाहणीची मागणी
संबंधित प्रशासनाने ऑरो लॅबसमोरील परिस्थितीची प्रत्यक्ष पाहणी करून सार्वजनिक रस्त्यावर होणाऱ्या लोडिंग-अनलोडिंगबाबत योग्य ती कार्यवाही करावी. तसेच कंपनीच्या आवारातील उपलब्ध जागेचा वापर करण्याबाबत संबंधितांना सूचना द्याव्यात, अशी मागणी नागरिकांनी केली आहे.
