बोईसर, ता. १३ : बोईसर शहरातील मधुर नाक्याजवळ एका व्यक्तीला मारहाण केल्याची घटना समोर आली असून, या घटनेचा सीसीटीव्ही व्हिडिओ सोशल मीडियावर व्हायरल होत आहे. या प्रकारामुळे परिसरात चर्चेला उधाण आले आहे.
प्राथमिक माहितीनुसार, कौटुंबिक वादातून हा प्रकार घडल्याची चर्चा आहे. मात्र, मारहाणीमागील नेमके कारण, घटनेची पार्श्वभूमी आणि त्यामध्ये सहभागी असलेल्या व्यक्तींबाबत अद्याप अधिकृत माहिती समोर आलेली नाही.
दरम्यान, सोशल मीडियावर व्हायरल होत असलेल्या सीसीटीव्ही चित्रणाच्या आधारे पोलिसांकडून तपास करण्यात आला आहे का, संबंधित व्यक्तींविरोधात तक्रार दाखल झाली आहे का आणि या प्रकरणी कोणती कायदेशीर कारवाई करण्यात आली आहे, याबाबत अधिकृत माहिती उपलब्ध झालेली नाही.
या घटनेची सत्यता पडताळून संबंधितांवर नियमानुसार कारवाई होणार का, याकडे नागरिकांचे लक्ष लागले आहे.